Прэм’ер-міністр Міхаіл МЯСНІКОВІЧ і віцэ-прэзідэнт Расійскай акадэміі навук Жарэс АЛФЁРАЎ слухаюць расказ маладога вучонага Юрася ГЕЦЭВІЧА пра распрацоўкі ў галіне сінтэзу беларускага і рускага маўлення
Учора пачаўся беларускі інавацыйны тыдзень
Прэм’ер-міністр, які яшчэ нядаўна ўзначальваў Нацыянальную акадэмію навук, добра паінфармаваны аб навінках, якія дэманструюцца ў экспазіцыі, таму знаёмства з выставай дасягненняў айчыннай навукі, якая пачынае Беларускі інавацыйны тыдзень, было, хутчэй, пратакольным.Але яго размовы з вучонымі, якія прадстаўлялі свае распрацоўкі, былі ажыўленымі і зацікаўленымі. Карыстаючыся нагодай, яны дзяліліся сваімі планамі па прасоўванні інавацыйных праектаў, гаварылі пра праблемы і, як водзіцца, прасілі аб садзейнічанні. Зрэшты, у апошнім, здаецца, неабходнасці не было, таму што шматлікія госці ўжо праяўлялі велізарную зацікаўленасць да навінак.
У выставе інавацыйных праектаў, разгорнутай у Нацыянальнай бібліятэцы Беларусі, якая дэманструе каля 800 экспанатаў, прымаюць удзел 116 арганізацый, у тым ліку 28 прыватных.
Сярод распрацовак увагу прыцягваюць навейшыя лекавыя прэпараты, напрыклад, «Нитаргал», якія прызначаны для лячэння сардэчна-сасудзістых захворванняў, прылада аховы ад электрамагнітных выпраменьванняў сотавых тэлефонаў, дзіцячыя прадукты з высокай харчовай і біялагічнай каштоўнасцю. Заўсёды мнагалюдна ля стэндаў з беспілотнымі авіяцыйнымі комплексамі, святлодыёднымі свяцільнямі, каля модульнага многазвеннага аўтацягніка.
Гэтыя экспанаты цікавы ўсім. Але ёсць у экспазіцыі і распрацоўкі, якія, пры ўсёй іх унікальнасці, цікавыя толькі спецыялістам. Напрыклад, беларуская сістэма аўтаматызыванага праектавання адзежы «Автокрой» стала прадметам глыбокай зацікаўленасці швейнікаў, таму што дапамагае “з нічога” атрымоўваць велізарную эканомію. Камунальшчыкі і вытворцы пітной вады звярнулі ўвагу на станцыі ачысткі вады. Тэстамі ДНК-дыягностыкі ў спорце зацікавіліся інвестары адразу некалькіх краін.
Сёння выстава, разлічаная на два дні, закрываецца. Безумоўна, гаварыць пра яе поспехі пакуль рана. Але, судзячы па ўсім, многія навуковыя калектывы, зацікавіўшыя тут патэнцыяльных інвестараў і партнёраў, змогуць развіць поспех і выйсці на рынак з новым таварам.
16.11.2011
Дзмітрый ПАТЫКО
Фота: Аляксандр ТАЛОЧКА
Крыніца: http://www.respublika.info/5382/topic/article51050/